Gaan Wae the Wind
As Orcadians, wur weel wint wae the wind. Forivvir aboot- hands, hids changin mood and strength shapes whit a day might lukk like. A risin wind closes schools, hindirs fokk fae gittan tae thir wark, and renders lifeline services, lifeless. A settled day is aisy; planes and botts cairtin fokk and freight north and sooth, back and fore. Business as normal. In the spring time, the sharp shards o a loiteran wintir wind mak wur daffodils shivvir and shakk. This fresh wind birls aroond is, tickilin wur nostrils wae the smells o new calves, peedie caddies and dung. Summer winds cerry sooth country fokk wur way. Toorists, sporty fokk, artists and musicians. Whit fun! Cum show week a warm wind pits a sheen on wur peely wally skin and gaes the baest a bit o relief fae unkun haet at the side o the dyke. Auld men’s keps are cast aff and summer frokks git an aireen. The hairst wind whistles aroond the combine as hid threshes the grain fae the strae. A graand dryin wind makks fur a good crop o bedeen fur the winter. No need noo though, fur chaffy seks. The wind maks wir eyes swee wae the pungent smell o propcorn waftin aboot. Whelin day and night, the winter wind can be tiresum . Hids icy chill makks the lugs sing and the nose run as hid goes rite throo you, laevin a body chilled tae the bone.
Ach hid’s wur wind and wae like hid.